左右紅藍綠：成立創科局問題出在哪裡？ (2015.7.20)
創新及科技局建議再次提交立法會，仍然未能通過，究竟問題出在喺邊度？
其實香港專責科技政策的政策局本來就有。1998年成立的資訊科技及廣播局主理科技政策，初有成績，可惜2002年被殺局後，即使一些工作繼續，但係就變成門面工夫而沒有新意。所以，一個能夠專注統籌和資源調配的政策局，是有利科技和整體社會發展。
咁點解而家成立創科局會遇到咁大嘅阻力？
資訊科技界多數人，仍然支持成立創科局，但近月的確多了業界人士有疑慮，不少人都不支持倉促成立新政策局。這種改變，或多或少與梁振英有關。
自從梁振英做特首之後，社會氣氛變差咗，市民對政府也失去信心，以他三年多來所建立的形象和誠信，部分公眾無可避免將創科局與梁振英掛鉤，產生懷疑。
咁係唔係對人不對事呢？
如果政府有決心設立創科局，議員的問題不難解答。可惜嘅係，政府提交嘅文件粗疏，令人覺得政府自己都未想清楚新政策局的工作目標。監察政府是立法會的責任，如果政府未想清楚，那麼成立創科局能否達到原先目標？又會否被別有私心的人，利用嚟做不利社會的用途呢？
仲有，政府和建制派話已經「三次闖關」失敗，將責任推俾泛民。其實那只是「插水扮被人勾跌」。政府在今年兩次提交方案時，都揀是在財政預算案死線和休會前短時間提交，好似專登揀喺度門差唔多閂哂嘅時候，先專登衝過去，偏偏唔肯喺度門開哂嘅時候慢慢行過去，製造建議被泛民拉布拖死的觀感，等梁振英可以繼續大嗌vote them out。
不過政府及建制派這場插水戲做得好假吓啫。上星期六的財委會，建制派議員發言比民主派多，但係就幾乎無問關於創科局嘅政策問題，而是攻擊民主派，特別係我本人，好似監察政府，不是他們的責任。
事到如今，問題可以點樣化解呢？程序上只要政府喺度門大開嘅時候，即係十月，將創科局放上財委會議程嘅第一項，要通過會輕鬆得多。其實喺過去幾個月，政府官員已經開始同議員會面溝通，只不過又被梁振英突然決定七月闖關「差喎」咗。