早前ATV上黎拍野，攝影師、燈光師、導演、助導、記者，夾埋成條crew上晒黎office，好大陣仗，就算之前〈新聞透視〉上黎拍野，都係攝影，燈光，同記者三個人，今次真係有啲受寵若驚。
Set好晒野之後，到我埋位，導演話：「你放鬆的啦，好似平時咁就得架喇，我睇你平時講野都唔係咁細聲架啦。」
導演呢句說話真係打中我心坎，我一直都覺得呢排狀態麻麻地，原來問題個徵結就係一個字：「緊」。
我以前寫嘅Blog，甚至係我係Forum寫嘅文，可讀性可能比起收稿費寫嘅文仲高，近期情況更加明顯。而呢個情況，應該係因為呢期個人真係好「緊」。
文章寫得「緊」，除左冇咁好睇之外，仲會寫得慢。寫自己Blog諗住冇乜人睇，個人會輕鬆好多，寫都寫得快啲，錯字都唔駛check咁緊啦。
而家我最需要既就係將心態調節到任何時候都可以「不鬆不緊」，呢樣真係非常困難，是關做人真係太多野要諗，好多時都會「諗多左」，綁住左自己嘅思維，造成好大壓力。
人緊張，個腦就實，近排寫野都係以交稿為主，少機會寫自己野，越係想谷出黎就越冇野睇，無辦法之下唯有求其寫啲野，郁少少都好過完全唔郁。
有時會好懷念玩Forum嘅日子，以前用網名，冇人知你邊個，睇你寫野嘅人又係「都唔知係邊個」嘅網友，就算真係約出黎飲野唱K，都係只談風月，所以寫乜都得，真係當日記咁寫，第日睇返得啖笑。而家唔同喇，生意上嘅朋友又會睇，屋企人又會睇，甚至連女朋友的家人都會睇，點寫呀。
每次有大單野搞，個人就會好緊，一條象筋拉到盡就會斷，但現實唔到你斷左就投降，斷左都要做架，最多係跛住跛住咁做囉，有時真覺得自己係賤骨頭，打工有幾痛苦？痛苦得過而家？
The post 放鬆啲啦 appeared first on 偉大航道 The Startup Grand Line.
Source: grandline.hk