譚偉豪議員就「發揮青年人公民參與力量」議案發言

二零一零年七月七日  

主席：

我動議通過印載於議程內的議案。 

第一部份：【網絡世代激發社會運動，青年人期望在改革中發揮參與角色。】

主席，我今日動議的議案係：「發揮青年人公民參與力量」，青年人係社會嘅未來，我哋應該要發揮佢哋嘅參與同智慧，一齊去營造一個屬於佢哋嘅未來社會。

主席，我今日嘅發言主要圍繞3方面：第1點我想講嘅係，政府一定要深深明白，網絡世代已經來到，而且會激發更多社會運動。呢一代青年人隨網絡一起成長，被稱為網絡世代（Net Generation），依本書—「N世代的撞擊」，就給我很大的啟示。依個作者為寫依本書，訪問咗12個國家，超過7000名年齡界乎16-29歲嘅青年人，結果發現佢哋有2個特點：

（i）  網絡世代敢於挑戰權威，講求人人獨立和平等；

（ii） 網絡世代追求個人的選擇自由和表達自由。

正因為網絡世代有呢兩項特性，激發更多社會運動，青年人期望在這些改革中，可以發揮參與嘅角色，成為推動社會變革的一股力量。

＜實例＞當世貿組織在美國西雅圖舉行會議，反全球化人士借用互聯網，在當地發起大規模示威抗議；此外，菲律賓民眾曾經通過互聯網和手機串聯，在首都馬尼拉舉行集會抗議，迫使埃斯特拉達總統下台。內地網民亦曾經發起集體抵制法國連鎖超市「家樂福」。

所以，大家唔好以為，香港因為有社民連三子，先至令到一些青年人特別激進，事實係，青年人希望參與社會運動進程，係全球嘅普遍現象；政府亦唔好諗住要改變呢種現象，因為咁樣等於係「痴人說夢」。

相反，政府一定要學習認同網絡世代，青年人有較為激進的行為，是完全健康，而且對社會是有價值嘅，所以政府唔應該將佢哋當作為另類選民，以千方百計去安撫佢哋，希望可以令佢哋和諧一點，這是於是無補，唯一做法是讓佢哋一齊改革社會，參與其中。

第二部份：【政府官員要克服「網絡焦慮症」，預備一個更好的環境，令香港邁向民主2.0】

主席，我想講嘅第二點係，政府唔好墨守成規，一定要與時並進，特別政府官員要克服「網絡焦慮症」，預備一個更好的環境，令香港邁向民主2.0。如果要問，係政府裡面，邊嗰會怕咗網絡呢？我諗好多人都估到係特首，事關我舊年五月十四日已經係呢度向特首提問，問佢夠唔夠膽、同埋有冇打算舉行「行政長官網上答問大會」，至今雖然未有下文，但的確佢響網上亦參與唔少，特別係最近嘅起錨行動，可以見到佢響度慢慢改變中。

點解特首同埋其他政府官員會患上「網絡焦慮症」呢？（i）時間壓力焦慮：大多數官員嘅時間表都忙到透唔到氣，仲邊有時間同網絡世代進行互動溝通？（ii）委屈感焦慮：在網上聽到或睇到針對自己的批評和指責，很多時都尖酸刻薄，令佢哋覺得「吃力不討好」；（iii）網絡問責焦慮：官員既要面對「行政問責」，仲要面對「網絡問責」，因為在網上講錯說話，好容易會被人無限擴大，加上好多時都要即時回應，所以佢哋會加倍緊張。

如何化解網絡焦慮症？其實，最緊要佢地願意放下身段，肯在「網海」暢泳，同時，官場中亦要有容忍犯錯嘅文化，讓高官即使偶然講錯說話，亦可馬上更正，當然高官都要有胸襟，接受被人鬧，能然做到依一步，佢哋遲早都會適應。就好似做議員，點都要落過區，接受過選舉洗禮。

講到呢度，我都好同情一批開咗facebook交差嘅副局長同政治助理，某程度上佢地其實係「苦主」，事關政府在這方面係三無：對社區媒體無系統嘅策略，亦無技術支援，更加無「網絡問政」制度，好似點樣去收集問題、用乜嘢標準同方式篩選問題並作答、幾時回覆等等，一概欠奉。我認為，政府應該睇吓歐美國家，特別係美國同英國，佢哋有好多例子可以作為政府嘅參考。

政府另一樣要做嘅，就係制訂清晰的公共資訊開放政策。主席，我希望政府明白到，在網絡世代，贏得市民的信任與否，取決於資訊透明化的程度，如果官員隱瞞資訊，網絡世代就會認為當中可能有不可告人的秘密，政府必須採納「透明化」為核心價值，近年，很多市民都關注到香港現有的《公開資料守則》的成效，申訴專員公署便揭示了政府推行《公開資料守則》的7宗罪，究竟是否應該訂立《資訊自由法》，以及是否把公營機構納入《守則》的規範中？我覺得，政府和社會各界都應該深入探討一下。

事實上，在進入網絡2.0 時代之後，青年人愈來愈積極討論各項社會議題，更逐漸成為社會上其中一個重要的議政群體，「網上問政」的風氣在國際間愈來愈普遍。美國總統奧巴馬最能夠認識到網絡世代的公民參與力量，響競選總統期間，會善用互聯網去凝聚支持他的力量；當選後，佢又透過「網上議政會議」（online town hall meeting），直接同民眾交流。佢嘅例子正好體現咗由民主1.0進化到民主2.0。第一代民主（Democracy 1.0）確立了選舉制度和可信任的政府機構，但民眾幾乎沒有真正參與政策制定；今天由N世代所推動嘅，係第二代民主（Democracy 2.0），以「市民積極參與商議」為特色。

第三部份：[政黨和NGO都要參與推動]

主席，第3點我想講嘅係，要推動青年人公民參與力量，我哋議員、政黨和NGO絕對有好大責任。點解我會咁講？因為議員、政黨和NGO，都係市民和政府之間嘅橋樑，但政黨和NGO應該點做呢？我認為，網上問責是有助政黨和NGO開拓空間，政黨和NGO應該多聘用青年人，授權他們，提升他們，讓他們為你嘅組織帶來真正嘅變革。

政黨要年青化，亦要善用網絡力量。例如美國猶他州有立法委員，會在網站上張貼州議會正討論嘅法案，民眾可以隨時上網表達意見。如果我哋立法會議員同政黨都可以做到善用網絡，讓市民共同參與討論各項法案，凝聚網絡智慧，我相信，咁樣絕對有助增加議員和政黨的認受性。

至於NGO方面，我認為，網絡化係NGO必走之路，傳統嘅NGO必須吸納網絡聲音，提供更多網絡化服務。所以我同張國柱議員正努力推動本港發展「網上社工」，另外我同社聯亦正密切關注，弱勢社群日常使用資訊科技遇到困難嘅問題。而創立電子社區，提供新型式服務，亦是NGO未來發展嘅大勢所趨。

主席，傳統上，要落實有效管治，要靠官員智慧，到咗而家，係要靠社會智慧。因此，政府要參與，政黨要參與，NGO要參與，青年人要參與，從而共同推動社會改革。 

[總結]

主席，我重申，要發揮青年人公民參與力量，必須三方面配合：（一）政府唔好怕、唔好阻攔，要讓青年人有機會參與社會改革運動；（二）政府必須克服對網絡嘅恐懼，將透明化變為核心價值；（三）政黨和NGO都要共同參與。我相信，我哋一齊努力，將社會上的不同矛盾，化成整合的力量，促成社會的變革和進步，令香港社會更公平，更開放。

主席，我謹此陳辭。

Go to Source