有留意 IP Cam 嘅朋友或者都知道美國嘅 Arlo 年初係 CES 2019 公佈左一款好勁，擁有 4K HDR 拍攝能力，加入彩色夜視及 LED 燈嘅 IP Camera - Arlo Ultra。
美國個邊係公佈後有唔少迴響，但一直都無消息講香港幾時出，來到六月終於都有消息，依家 Arlo 香港網上旗艦店終於有消息，佢地版面多左個 Arlo Ultra 預購優惠，預購 2 鏡套裝送額外電池、3 鏡套裝送電池及充電座，正式售價就係 2 鏡套裝賣 HK$6,188，3 鏡套裝賣 HK$8,288。
Arlo Ultra 其中一個突破點係夜視唔再得黑白，而係有彩色，以上面條官方示範片來睇，夜晚嘅效果雖然未去到日頭咁，但真係幾清楚，可以睇得清楚個人樣，唔係一堆野確實唔錯。
根據解說，今次 Arlo Ultra 也都有 180 度無變形鏡頭，拍攝效果也較一般嘅 1080p 鏡頭清晰四倍，支援 Apple Watch 功能，可以係手錶直接睇到畫面。
至於上一代 Arlo Pro 2 擁有嘅 IP68 防水防塵功能、雙向通話、100 分貝警示、加密傳送、支援 IFTTT、Google Assistant、Alexa 語音助手等一樣都有，難怪價錢唔平啦！根據網站指示，依家預購最遲七月會到貨.
查詢：Arlo 香港旗艦店
